Fecoht Informa

Fecoht Informa

10 marzo 2013

15.000 personas se manifiestan el 10M en Galicia

Preto de 15.000 persoas mobilizáronse hoxe en Galicia para esixir un cambio nas políticas para saír da crise e a favor da rexeneración da democracia



Este mediodía, preto de 15.000 persoas participaron en diferentes manifestacións en toda Galicia para esixir un cambio nas políticas para saír da crise, para o que cómpre situar a creación de emprego e a reactivación económica no centro. Sumáronse, así, a unha convocatoria conxunta de UGT e CCOO coa que tamén reclamaron a rexeneración da democracia.

Os secretarios xerais dos dous sindicatos, Xosé Manuel Sánchez Aguión (CCOO) e José Antonio Gómez (UGT), participaron na marcha de Ferrol. No resto de Galicia houbo manifestacións tamén na Coruña, Santiago de Compostela, Lugo, Ourense, Vilagarcía de Arousa, Pontevedra e Vigo, ademais dunha concentración en Burela. As mobilizacións transcorreron en paralelo a outras no resto do Estado —sesenta, en total— que, á súa vez, forman parte dunha campaña máis ampla que impulsa a Confederación Europea de Sindicatos (CES).





Con esta acción, UGT e CCOO, xunto co sindicalismo de clase europeo, reproban as actuacións dunha Comisión Europea enrocada en políticas fracasadas, allea aos problemas da cidadanía. Tras cinco anos de crise, o único que crece dentro e fóra de Europa é a desigualdade, o desemprego, a miseria, a exclusión social e o descrédito dos dirixentes políticos que se empeñan en combater a crise con políticas que demostraron ser inútiles.


CCOO e UGT convocaron as manifestacións polas seis millóns de persoas en paro no Estado español, 300.000 en Galicia. Na nosa comunidade autónoma, 120.000 persoas non reciben ningún tipo de prestación, e hai 91.000 fogares galegos con todos os seus membros no paro, mentres que o 22 % da poboación galega vive por baixo do limiar da pobreza. Dous días despois da conmemoración do Día Internacional da Muller Traballadora, UGT e CCOO lembran as funestas consecuencias para o emprego feminino da reforma laboral, que intensificou os efectos perniciosos da crise sobre as mulleres: menos emprego e máis precario.


Así as cousas, o desmantelamento dos servizos públicos (sanidade, educación, dependencia, servizos sociais…) e calquera reforma unilateral do sistema público de pensións que o converta noutro instrumento das políticas de axuste, espoliando outra volta os dereitos da cidadanía e abandonando á súa sorte os actuais e futuros pensionistas, non fará máis que empeorar a situación, alertan os sindicatos.


Por todo isto, CCOO e UGT esixen que se lle devolva á política a súa condición de ferramenta ao servizo das persoas, expulsando os corruptos da vida pública e acometendo as reformas constitucionais que cumpran. Do contrario, erguerase diante dos ollos da sociedade un perigoso muro de desconfianza cara ás institucións que acelerará a deterioración da armazón institucional que xurdiu da transición democrática: hai que esixir que se lle devolva á política a súa condición de ferramenta ao servizo das persoas.

No hay comentarios:

Publicar un comentario