Carlos Búa Absuelto de la condena de 3 años y un dia de Cárcel

CCOO celebra a absolución do compañeiro Carlos Búa e dous sindicalistas da CIG

·   Foran condenados por supostas coaccións na folga do comercio da alimentación

·   A sentenza é firme e contra ela non cabe recurso

A Audiencia Provincial de Pontevedra revogou a sentenza do Xulgado do Penal número 1 que condenaba o compañeiro de CCOO, Carlos Búa, e a Marcos Cadórniga e Carlos Alján, da CIG, a cumprir tres anos e un día de prisión por un delito de supostas ameazas e coaccións cometidas cando actuaban de piquete durante a folga do comercio da alimentación do ano 2009.

A sentenza cita xurisprudencia do Tribunal Constitucional para lembrar que os piquetes son legais, e que non todos os excesos nas súas actuacións son necesariamente delituosos.

O fallo do tribunal provincial establece que «o exercicio abusivo do dereito de folga non pode identificarse coa participación en grupos de folguistas, e tampouco a simple representación dos mesmos é, de acordo coa Lei, motivo suficiente para ser responsabilizado polo delito de coaccións cometido por outros». Esta sentenza é firme e non cabe recurso.

Carlos Búa e os dous compañeiros da CIG, en compañía doutros membros dos sindicatos, mantiñan desde o pasado 23 de novembro unha folga rotativa de fame nunha carpa instalada diante da Audiencia Provincial. Era o xeito que tiñan de protestar pola sentenza inicial, que consideraban abusiva.