A PATRONAL MOSTRA AS SÚAS VERDADEIRAS INTENCIÓNS: ELIMINACIÓN
DOS NOSOS DEREITOS E EMPOBRECEMENTO
A menos dun mes para que o actual convenio perda a
súa vixencia normativa, a patronal (ou máis ben parte dela porque hai
asociacións empresariais que nin sequera se dignan acudir ás reunións de
negociación) quitou a careta e puxo derriba da mesa o que pretende realmente para
as traballadoras e traballadores do Comercio Vario da provincia da Coruña.
Entre outras cousas:
·
Desaparición da cláusula que garante
as condicións máis beneficiosas que existen en moitas empresas. Isto significa
que cando lles conveña poderán absorber
ou incluso eliminar calquera cantidade que se cobrase actualmente por riba de
convenio: complementos persoais, conta convenio, comisións…
·
Supresión
da paga extra de marzo nas empresas que aleguen non ter beneficios (non
especificaron como se comprobaría isto: se terían en conta os ingresos que,
indefectiblemente, vaia ben ou mal a empresa, sempre se embolsan os
propietarios; se o cálculo se faría cos datos globais da empresa, cos
resultados na provincia, no centro de traballo…).
·
Eliminación do complemento durante as
baixas por enfermidade común ou accidente non laboral. É dicir, cando caésemos
enfermos os nosos ingresos veríanse reducidos da seguinte maneira:
—os 3 primeiros días non se cobraría nada;
—do
día 4 ao 20: o 60% do salario;
—do
día 21 en adiante: o 75%.
·
En caso de baixa causada por accidente
de traballo tamén nos queren castigar cunha perda de entre o 10 e o 15 por cento dos nosos salarios.
·
Interrupción do cobramento do plus de transporte cando non se traballe
por calquera motivo (baixas, vacacións, permisos…) e diminución proporcional para os contratos a tempo parcial.
·
Ao entrar nunha nova empresa pretenden
que permanezamos durante 3 anos cobrando
un 10% por debaixo do que marque o convenio.
·
Desaparición
de tódalas categorías, que quedarían refundidas en tres
grupos profesionais dentro dos cales todo o mundo cobraría o mesmo e operaría a
mobilidade funcional total. É dicir, que nos poden obrigar a desempeñar
calquera función sen que iso se vexa reflectido no noso salario nin se
consolide ningún dereito.
·
Diminución da porcentaxe obrigatoria
de persoal indefinido. Noutras palabras, aumento da temporalidade.
·
Negativa a mellorar ningún dos
permisos retribuídos que aparecen no convenio.
·
Destrución do sistema actual de
calendarios anuais coa implantación de
horarios mensuais e establecemento dun mínimo de xornada irregular anual do
15%, o que supón a creación dunha bolsa de 250 horas aproximadamente de
distribución ao antollo do empresario.
·
Posibilidade de desprazamento obrigatorio
até 50km (por ex.: A Coruña‑Narón).
Os empresarios do pequeno e mediano comercio
queren saír da crise sacrificando os nosos dereitos e salarios. Mais cando
nadaban na abundancia nunca se preocuparon de mellorar o convenio de maneira
proporcional. Agora acórdanse de empeoralo. E, por outro lado, as grandes
empresas inhíbense da negociación coa intención de que o convenio ben
desapareza ben empeore as súas condicións de maneira esaxerada para poderen
manobrar con facilidade e non verse obrigadas a conceder as condicións por riba
de convenio que si se poden permitir. Cun convenio provincial depauperado como
o que pretende endosarnos a patronal as grandes cadeas xa non terán que dar
máis do que agora existe. Incluso poderán quitalo se lles peta.
AS TRABALLADORAS E OS TRABALLADORES DO COMERCIO DA
PROVINCIA DA CORUÑA XA DEMOSTRAMOS NA NEGOCIACIÓN DO CONVENIO ANTERIOR QUE
SABEMOS DEFENDER OS NOSOS DEREITOS. NON PODEMOS PERMITIR QUE PRECARICEN MÁIS
AÍNDA AS CONDICIÓNS LABORAIS DO SECTOR E QUE NOS CONDENEN Á POBREZA.
ASEMBLEA XERAL DE TRABALLADORES DO COMERCIO
(na que se debaterán as posibles mobilizacións para
evitar que nos arrebaten os nosos dereitos e os nosos salarios)
Coruña: Edificio Sindicatos
Santiago: Hotel Peregrino
Ferrol: Edificio
Sindicatos
Mércores, 19 de xuño
22:30 horas
O NOSO FUTURO ESTÁ EN XOGO. ACUDE!!!
No hay comentarios:
Publicar un comentario